ЊУ ДЕЛХИ (АА) – Густата магла како резултат на загадувањето на воздухот денес го наруши воздушниот сообраќај во индискиот главен град Њу Делхи, соопштија официјални лица, јавува Анадолу.

Авиокомпаниите што оперираат на аеродромот во Њу Делхи на американската компанија за социјални медиуми X напишаа дека „слабата видливост“ поради густата магла влијаела врз летовите за сите авиокомпании.

Најголемиот авиопревозник во земјата „ИндиГо“ соопшти дека главниот град утрово го гледа „првиот знак за зимска магла, а видливоста околу аеродромот моментно е намалена“.

Иако индиските власти сè уште не го открија бројот на откажани и одложени летови, индиската телевизија НДТВ, цитирајќи го Флајтрадар24, соопшти дека на аеродромот во Њу Делхи се откажани околу 100 лета, а над 300 се одложени.

Прекините на летовите доаѓаат во време кога главниот град се соочува со нивоа на токсично загадување последните неколку дена.

Податоците од Централниот одбор за контрола на загадувањето на Индија покажаа дека индексот на квалитет на воздухот (AQI) синоќа изнесувал 461.

Резултатот на состојбата со индекс на квалитет на воздухот помеѓу 201 и 300 се смета за лош, од 301 до 400 многу лош и помеѓу 401 и 500 - тешко загадување. Според експертите, AQI во тешка категорија ги погодува здравите луѓе.

Властите презедоа мерки против загадувањето за да го спречат смогот и ги повикаа жителите, особено ранливите категории, да останат во своите домови.