Грција ги советува своите граѓани веднаш да ја напуштат Украина

АТИНА (АА) - Грција денес ги советуваше своите граѓани веднаш да ја напуштат Украина, обесхрабрувајќи ги сите патувања низ Украина, соопшти грчкото Министерство за надворешни работи, пренесува Агенција Анадолија (АА).

Во соопштението, Министерството соопшти дека е одржан состанок на кој учествувале министерот за надворешни работи Никос Дендиас, министерот за национална одбрана Никос Панајотопулос, министерот за образование и верски прашања Ники Керамеос и заменик-министерот за надворешни работи Андреас Кацаниотис.

„Министерството за надворешни работи не препорачува патувања низ Украина, а исто така ги советува грчките граѓани во таа земја веднаш да ја напуштат земјата“, соопшти Министерството.

Министерството, исто така, истакна дека бројот на вработени во грчката Амбасада во Киев е намален, додавајќи дека персоналот во Генералниот конзулат во Мариупол ќе биде зајакнат.

Препораките доаѓаат во време на зголемени тензии по должината на границата меѓу Украина и Русија поради зголеменото распоредување на руска Војска.

Украина е зафатена од конфликт во нејзините источни региони од март 2014 година по руската инвазија и анексијата на Крим.

Москва неодамна распореди над 100.000 војници близу границата со Украина, предизвикувајќи стравувања дека Кремљ би можел да планира нова воена офанзива против својот поранешен советски сосед.

Русија негира дека се подготвува да изврши инвазија и ги обвини западните земји дека ја поткопуваат нејзината безбедност со проширувањето на НАТО кон нејзините граници.