Zeynep Beyza Kılıç
04 Април 2022•Ажурирај: 05 Април 2022
ИСТАНБУЛ (АА) - Глобалните цени на нафтата пораснаа денес, бидејќи војната меѓу Русија и Украина значително ги оптоварува светските пазари, пренесува Агенција Анадолија (АА).
Меѓународната референтна цена на нафтата „брент“ утринава изнесуваше 105,78 долари за барел по растот на цената од 1,33 отсто по затворањето на претходната сесија кога цената беше 104,39 долари за барел.
Американската референтна вредност „West Texas Intermediate“ (WTI) тргуваше по цена од 100,50 долари по барел по порастот на цените за 1,24 отсто, откако што на претходната сесија изнесуваше 99,27 долари по барел.
За да се избори против високите цени на нафтата, 31 земја-членка на Меѓународната агенција за енергетика (ИЕА) на 1 април се согласи за ново ослободување нафта од резервите за вонредни состојби како одговор на превирањата на пазарот предизвикани од руската војна во Украина.
Претходно групата се согласи да ослободи 62,7 милиони барели од резервите за итни случаи. ИЕА оваа недела ќе објави детали за ново пуштање на залихи за итни случаи.
Во меѓувреме, најавен е двомесечен прекин на огнот меѓу јеменската влада и Хусите поддржани од Иран за да се олесни безбедноста на снабдувањето со нафта и да се намали притисокот врз цената на нафтата.
Специјалниот пратеник на Обединетите нации (ОН) за Јемен, Ханс Грундберг, на 1 април објави дека јеменската влада и Хусите се договориле да ги прекинат воздушните, копнените и поморските операции.
Но, на 3 април јеменската армија ги обвини бунтовниците за прекршување на двомесечниот хуманитарен прекин на огнот.
