Büşra Nur Çakmak
07 Јуни 2022•Ажурирај: 08 Јуни 2022
АНКАРА (АА) - Членките на НАТО се посветени на одбраната на секоја педа од територијата на Алијансата, изјави германскиот канцелар, јавува Агенција Анадолија (АА).
Олаф Шолц рече дека Германија ќе го зголеми својот придонес за зајакнување на источното крило на НАТО.
„Ние ќе создадеме силна бригада, разговаравме за тоа меѓусебно и ќе треба да работиме на тоа“, изјави Шолц на заедничката прес-конференција со претседателот на Литванија, Гитанас Науседа, летонскиот премиер Кришјанис Каринш и естонската премиерка Каја Калас.
Шолц рече дека одлуката на Германија да одвои 100 милијарди евра, „специјален фонд“ за модернизирање на нејзините вооружени сили дополнително ќе го зајакне НАТО и ќе ја направи земја со „најсилните вооружени сили во Европа и една од најсилните во НАТО“.
Тој рече дека земјите на ЕУ и Германија ќе продолжат да ја поддржуваат Украина сè додека тоа е неопходно.
„Германија е една од главните поддржувачи на Украина во однос на војската и веројатно само САД пружаат поголема поддршка од нас“, вели Шолц.
Науседа рече дека лидерите разговарале за војната на Русија врз Украина и за одговорот на Европа.
„Ние мораме да изградиме силен одговор и да ја зајакнеме нашата одбрана наспроти руската агресија“, рече Науседа, додавајќи: „Ние се согласивме за потребата од зајакнување на одбранбените капацитети во балтичките земји со зголемување на бројот на распоредени војници, зајакнување на воздушната и поморската одбрана.“
„Јас верувам дека никој нема илузија за Русија, во моментов. Ние мора да сфатиме дека руската воена закана нема да замине. Таа ќе остане закана на долг рок за целосната евроатлантска област“, додаде тој.
