Германската војска отпушти 62 војници поради поврзаност со десничарскиот екстремизам

Германските вооружени сили минатата година отпуштија 62 војници поради десничарски екстремистички активности и изјави, објавија официјални лица во денешниот извештај, јавува Анадолу.

Војската, исто така, одби 94 апликанти во текот на регрутирањето поради загриженост за нивната посветеност на демократското уредување на Германија.

Во извештајот на Министерството се документирани 205 инциденти во кои имало десничарско екстремистичко, расистичко или антисемитско однесување во 2023 година. Во некои случаи војници давале екстремистички изјави или изразувале поддршка за Рајхсбургер, десничарско движење што го отфрла легитимитетот на Сојузна Република Германија.

Извештајот е објавен во услови на растечка загриженост за крајно десничарскиот екстремизам во германските безбедносни сили. Последниве години властите распуштија елитна полициска единица и гонеа голем број активни и пензионирани воени лица за планирање напади со складирање на оружје и одржување врски со екстремистички мрежи.

Пред две години десетици крајно десничарски екстремисти, меѓу кои и германскиот аристократ Хајнрих Ројс, беа уапсени за наводен заговор за соборување на Владата со државен удар. Осомничените, меѓу кои и поранешни полицајци, војници и резервисти, се обвинети за планирање акции, како што се упад во германскиот Парламент и киднапирање политичари со цел во земјата да предизвикаат услови слични на граѓанска војна и на крајот да ја соборат Владата. Повеќето од осомничените биле следбеници на движењето Рајхсбургер.