Германија ќе биде домаќин на Конференцијата за закрепнување на Украина следната недела

БЕРЛИН (АА) - Лидери и шефови на дипломатии од над 60 земји ќе присуствуваат на Конференцијата за закрепнување на Украина следната недела во Берлин, соопштија германските власти денес, јавува Анадолу.

Дводневната Конференција, што ќе започне во вторник, ќе се фокусира на мобилизирање меѓународна поддршка за економска стабилизација на Украина, закрепнување од војната и реформи за членство во ЕУ.

„Заедно со голем број партнери од политиката, бизнисот, граѓанското општество и општините, сакаме да ја искористиме Конференцијата за закрепнување на Украина за да направиме сѐ што можеме за да ја поддржиме Украина на нејзиниот пат на реформи и обнова“, рече германската министерка за надворешни работи Аналена Баербок.

„Продолжуваме да ѝ даваме на Украина голема поддршка: економска, хуманитарна и политичка помош, како и доставување на итно потребното оружје. Ги правиме сите можни напори Украина наскоро да заземе место на масата на Европската Унија“, додаде таа.

Украинскиот претседател Владимир Зеленски се очекува да го посети Берлин следната недела и да говори на отворањето на Конференцијата, заедно со германскиот канцелар Олаф Шолц.

На Конференцијата ќе присуствуваат и претседателката на Европската комисија, Урсула фон дер Лајен, британскиот министер за надворешни работи Дејвид Камерон, францускиот министер Стефан Сежурн, шефот на италијанската дипломатија Антонио Тајани и шефот на полската дипломатија Радослав Сикорски.

Германското Министерство за надворешни работи соопшти дека Конференцијата ќе собере над 2.000 учесници од политиката, бизнисот, граѓанското општество и општините, а посебен фокус ќе биде ставен на улогата на приватниот сектор во процесот на закрепнување.

„Над 600 претставници од украински, германски и меѓународни компании во секторите како што се енергијата, здравството, логистиката и оружјето, заедно со претставници од општините и граѓанското општество, ќе ја претстават својата работа за време на настанот“, се вели во соопштението на Министерството.

„За прв пат, Конференцијата за закрепнување на Украина ќе стави акцент на општественото закрепнување – решавајќи области како што се образованието, здравството и учеството – и на закрепнувањето на општините и регионите. За да се обезбеди брз пристап на Украина во ЕУ, акцент е ставен и на неопходните реформи во Украина“, се вели во соопштението.