Ayhan Şimşek
04 Април 2025•Ажурирај: 06 Април 2025
БЕРЛИН (АА) - Германија денес упати критики за израелските воени воздушни напади врз сириска територија и го повика Израел да ги запре акциите кои не се дозволени според меѓународното право, јавува Анадолу.
На прес-конференцијата во Берлин, портпаролката на германското Министерство за надворешни работи Амели Тител истакна дека соседните земји не треба да ја компромитираат политичката стабилност на Сирија и процесот на национална транзиција.
„Вооружени сили можат да преземат воени дејствија на странска територија само во остварување на правото на самоодбрана“, рече Тител. „Додека Израел не објасни како овие воени мерки се во согласност со меѓународното право, ние го повикуваме да се воздржи од овие воени операции.“
Таа ја потврди поддршката на Германија за стабилноста на Сирија и нејзиниот тековен процес на национална политичка транзиција по падот на режимот на Асад.
„Главниот приоритет за Сиријците е враќање на долгорочната стабилност во Сирија, која не треба да биде загрозена од влијанието на странски сили“, нагласи таа.
Израелските воени авиони во средата извршија серија воздушни напади врз неколку локации во сирискиот главен град Дамаск и западните покраини Хама и Хомс.
Израелската војска тврди дека нападите биле насочени кон „воените капацитети што останале“ во воздухопловната база во Хама и базата Т4 во Хомс, како и друга воена инфраструктура во Дамаск.
Израелската Армија, исто така, започна копнена офанзива во Дара во јужна Сирија, каде што според локалните власти, загинале најмалку девет лица.
По падот на режимот на Башар ал-Асад во декември, Израел ја прошири својата окупација на сириската Голанска Висорамнина со заземање на демилитаризираната тампон-зона, потег со кој го прекрши договорот за недејствување со Сирија од 1974 година.
Израел, исто така, го искористи падот на режимот за изведување стотици напади врз воени локации низ Сирија, како и врз борбени авиони, ракетни системи и постројки за противвоздушна одбрана, според извештаите.
