Газа бележи нагло зголемување на кожни заболувања поради силниот топлотен бран

ИСТАНБУЛ (АА) - Во Газа е забележано значително зголемување на кожните заболувања поради силниот топлотен бран, изјави денес директорот на болницата „Ал-Шифа“, Мухамед Ебу Салмија, јавува Анадолу.

Ебу Салмија истакна дека поради високите температури во комбинација со сериозниот недостиг на вода за пиење жителите од сите возрасти се изложени на зголемен здравствен ризик низ Појасот Газа, објавија локалните медиуми.

Тој нагласи дека болниците се борат да овозможат основна медицинска помош бидејќи испораките на гориво се прекинати, што директно ги загрозува животите на пациентите и повредените. Сепак, здравствените работници продолжуваат да работат во тешки услови.

Ебу Салмија нагласи дека болниците се во критична состојба и дека неможноста да се користат уредите за спасување животи е катастрофална, истакнувајќи дека израелската армија продолжува да ги напаѓа училиштата, болниците и шаторите во кои се сместени раселените лица.

Тој дополнително нагласи дека хуманитарната катастрофа во Газа се продлабочува од ден на ден.

Израел се соочува со зголемена осуда за својата геноцидна војна во Газа, каде што од октомври 2023 година уби речиси 61.700 Палестинци.

Минатиот ноември Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел, исто така, се соочува со случај за геноцид пред Меѓународниот суд на правдата за своите воени дејства во енклавата.