Во сообраќајни несреќи за време на празникот Новруз загинаа 417 лица во Иран

ИСТАНБУЛ (АА) - Најмалку 417 лица загинаа во сообраќајни несреќи во последните десет дена во Иран, каде што е зголемена мобилноста на меѓуградските патишта поради празникот Новруз, пренесува Анадолу.

Во интервју за новинска агенција, Тесним, Тимур Хусеини, началник на Одделот за сообраќај на иранската полиција, информираше за сообраќајните несреќи што се случиле низ целата земја во деновите на Новруз.

„Загинаа 417 лица, а 11.392 лица се повредени во сообраќајни несреќи што се случија во период од 14 до 24 март“, рече Хусеини.

Иранскиот функционер изјави дека главни причини за несреќите се заморот, несоницата, невниманието и брзината.

Минатата година најмалку 1.168 лица загинаа во сообраќајни несреќи на меѓуградските патишта во Иран за време на 19-дневниот празник Новруз.

Новруз, кој се слави во март, за многу луѓе е предвесник на пролетта и симбол на мирот, радоста и единството.

Овој празник е поврзан со разни легенди за повторното раѓање на природата и раѓањето на нови надежи за луѓето, а често се практикуваат и разни молитвени обреди за подобра иднина на поединците и на човештвото воопшто.

За време на Новруз, луѓето се собираат, особено семејствата и пријателите, во нивните домови или на улица. Во првата посета на домот се оди со најстарите членови на семејството, луѓето се среќаваат и разменуваат подароци, а на зајдисонце се организира голема гозба, музика и играње.