Во израелските напади врз Газа убиени се приближно 40.300 Палестинци, од кои 42 во последните 24 часа

АНКАРА (АА) - Здравствените власти објавија дека уште најмалку 42 Палестинци се убиени во израелските напади врз Појасот Газа денес, со што вкупниот број убиени од 7 октомври минатата година досега се зголеми на 40.265, известува Анадолу.

Во соопштението на Министерството за здравство на палестинската енклава се наведува дека околу 93.144 лица се повредени во тековните напади.

„Израелските сили убија 42 лица и повредија 163 во четири 'масакри' на семејства во последните 24 часа“, соопшти Министерството.

„Многу луѓе сè уште се заробени под урнатините и на патиштата бидејќи спасувачите не можат да дојдат до нив“, се додава.

Израел продолжи со бруталната офанзива врз Појасот Газа од 7 октомври 2023 година, по нападот на Хамас, иако со резолуцијата на Советот за безбедност на ОН се бара итен прекин на огнот.

По повеќе од 10 месеци од почетокот на израелската војна огромни делови од Газа се во урнатини, а постои и блокада за храна, чиста вода и лекови.

Израел е обвинет за геноцид пред Меѓународниот суд на правдата (МСП), кој му нареди веднаш да ја прекине воената операција во јужниот град Рафа, каде што повеќе од еден милион Палестинци побараа засолниште од војната пред да започне копнената офанзива врз градот на 6 мај.