Во израелски напад врз шаторите на раселените Палестинци во централна Газа загинаа три лица, над 18 се повредени

АНКАРА (АА) - Најмалку тројца Палестинци загинаа денес, а над 18 се повредени во израелски напад чија цел беа шаторите на раселените лица пред болница во централниот дел на Појасот Газа, соопшти владината канцеларија за медиуми, пренесува Анадолу.

„Израелските окупациски сили извршија масакр во рамките на болницата Ал Акса со бомбардирање на неколку шатори во кои се сместени раселените лица“, се вели во соопштението на канцеларијата за медиуми за нападот на Деир ал-Балах.

„Овој брутален напад резултираше со смрт на три лица, и со над 18 повредени досега, вклучително и сериозни повреди кои моментално се лекуваат од медицинските тимови во болницата“, се додава.

Канцеларијата за медиуми го осуди „најостро овој нов масакр извршен од израелските окупаторски сили“.

Таа ги повика „меѓународната заедница и меѓународните и организациите на ОН да извршат притисок врз израелската окупација да го запре геноцидот и крвопролевањето во Појасот Газа“.

Прекршувајќи ја резолуцијата на Советот за безбедност на Обединетите нации со која се бара итен прекин на огнот, Израел се соочи со меѓународна осуда поради неговата континуирана брутална офанзива врз Газа.

Над 39.550 Палестинци, меѓу кои поголем дел деца и жени, се убиени во нападите на израелските сили врз Појасот Газа од 7 октомври.

Израел е обвинет за геноцид пред Меѓународниот суд на правдата, чија последна пресуда му наложи веднаш да ја прекине воената операција во јужниот град Рафа, каде што повеќе од милион Палестинци побараа засолниште од војната пред да започне копнената офанзива врз градот на 6 мај.