Во израелски воздушен напад врз Дамаск и Хомс загина еден војник на сирискиот режим, седуммина се повредени

ИСТАНБУЛ (АА) - Еден војник на армијата на сирискиот режим загина, а седуммина се повредени утринава во „израелската воздушна агресија“ врз главниот град Дамаск и руралната област Хомс во Централна Сирија, пренесува Анадолу.

Израелската армија изврши „воздушна агресија“ врз Сирија од правец на окупираната сириска Голанска Висорамнина и Северен Либан, објави државната сириска арапска новинска агенција (САНА), цитирајќи воен извор.

Новинската агенција додаде дека цел на Израел биле два воени пункта во населбата Кафар Сосех во Дамаск и уште еден во руралната област Хомс, при што е убиен еден војник, ранети се седуммина и предизвикани се материјални штети.

Во последниве месеци израелската армија спроведува чести воздушни напади низ Сирија во услови на тековни тензии на Блискиот Исток. Сепак, не ги коментира овие напади.

Израел наизменично извршува напади врз групи поддржани од Иран и воени позиции поврзани со армијата на сирискиот режим од почетокот на граѓанската војна во земјата во 2011 година.