Ekip
29 Јануари 2025•Ажурирај: 30 Јануари 2025
АЛ-АРИШ (АА) – Во координација на Агенцијата за управување со катастрофи и вонредни состојби на Туркије (АФАД), 14. „Брод на добрината“, кој носи хуманитарна помош за Газа, денес пристигна во египетското пристаниште Ал-Ариш, јавува Анадолу.
Бродот, кој тргна од турскиот град Мерсин вчера, 28 јануари, донесе 871 тон хуманитарна помош.
И покрај прекинот на огнот, Газа продолжува да се соочува со сериозна криза во храна како резултат на уништената инфраструктура и економскиот колапс, оставајќи голем дел од нејзиното население зависно од помош. Туркије е постојан партнер во обезбедувањето помош во храна за Газа, демонстрирајќи солидарност преку иницијативи предводени од организации како турската Црвена полумесечина и Агенцијата за управување со катастрофи и вонредни состојби (АФАД).
Во понеделникот стотици илјади раселени Палестинци почнаа да се враќаат од јужна и централна Газа во северниот дел на енклавата.
Во повеќе израелски и меѓународни извештаи се сугерира дека специјалниот пратеник на САД за Блискиот Исток, Стивен Виткоф, одиграл клучна улога во убедувањето на Нетанјаху да се согласи за прекин на огнот во Газа на 19 јануари.
Според договорот, индиректните преговори за втората фаза од договорот треба да започнат на 16. ден од прекинот на огнот.
Првата шестнеделна фаза од договорот стапи на сила на 19 јануари, прекинувајќи ја геноцидната војна на Израел во која се убиени над 47.300 Палестинци, повеќето жени и деца.
Поради израелските напади како исчезнати се водат најмалку 11.000 луѓе, предизвикани се исклучително разорување и огромна хуманитарна криза.
Во ноември минатата година Меѓународниот кривичен суд издаде налози за апсење на Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.
Израел се соочува и со случај за геноцид пред Меѓународниот суд на правдата за неговите постапки во Газа.
