Во Газа убиен уште еден палестински новинар, вкупниот број се искачи на 141

ИСТАНБУЛ (АА) - Уште еден палестински новинар е убиен во израелски воздушен напад денес, со што бројот на загинати палестински новинари од октомври минатата година достигна 141, соопшти владината канцеларија за медиуми на Газа, пренесува Анадолу.

Мухамед ал-Џамал, репортер на новинската агенција „Палестина сега“, го загуби животот кога борбените авиони извршија напад на неговата куќа во Рафа, во јужниот дел на Појасот Газа, се вели во соопштението на канцеларијата за медиуми.

Израел започна офанзива во Појасот Газа по прекуграничниот напад на палестинската група Хамас на 7 октомври, во кој загинаа околу 1.200 луѓе.

Бројот на загинати Палестинци во нападите на израелската војска врз Појасот Газа од 7 октомври 2023 година се искачи на 34.262.

Војната во Израел принуди 85 отсто од населението на Појасот Газа на внатрешно раселување, предизвика акутен недостиг на храна, чиста вода и лекови, додека 60 отсто од инфраструктурата на енклавата се оштетени или уништени, според Обединетите нации.

Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да ги запре геноцидните акти и да преземе мерки хуманитарната помош да стигне до цивилите во Газа.