Ekipa
10 Јули 2022•Ажурирај: 11 Јули 2022
ЛОНДОН (АА) - Актуелниот британски канцелар и државниот секретар за транспорт ги започнаа своите кандидатури за лидерската позиција во Конзервативната партија и за премиер на државата, со што вкупниот број кандидати досега достигна шест, јавува Агенција Анадолија (АА).
Канцеларот Надим Захави (55) објави соопштение во кое порача: „Мојата цел е едноставна: да ги овозможам можностите што ѝ беа дадени на мојата генерација, на сите Британци, без оглед на тоа кои сте и од каде доаѓате. Да се одржи бродот и да се стабилизира економијата.“
Тој додаде: „Благодарение на Брегзит, сега сме слободна нација. Да не зборуваме само за можностите што следуваат, туку да ги искористиме сега. Ако едно младо момче, кое дојде овде на 11 години без да знае збор англиски, може да служи на највисоките нивоа на Владата на Нејзиното Височество и да се кандидира за следен премиер, тогаш можно е сè.“
Захави е роден во Ирак, а откако се преселил во Велика Британија станал претприемач.
Тој истакна дека ќе ги намали даноците и се осврна на неговото ирачко курдско потекло, велејќи: „Бидејќи сум роден во Ирак и избегав од опасностите на Садам, знам дека безбедноста, сигурноста и слободата се работи што никогаш не можеме да ги земеме здраво за готово. Затоа, треба да се зголемат трошоците за одбрана како одговор на варваризмот од војната на Путин во Украина. Секогаш на прво место ќе ја ставам одбраната на нацијата.“
Секретарот за транспорт Грант Шапс (53) за британскиот дневен весник „Сандеј тајмс“ изјави дека сака да ја направи Британија најголема економија во Европа до 2050 година, а исто така вети дека ќе ги намали даноците.
„Мислам дека изгубивме од вид што треба да бидеме како конзервативна Влада. Треба да му веруваме на народот и да му дозволиме да ги троши своите пари како што сака. Мора да мапираме јасен пат до пониски даноци, а не само да изразуваме добри намери.“
„Ковид беше сведок на едно неопходно и големо проширување на државните трошоци и сосема невидено ниво на мешање на државата во приватниот живот на луѓето“, рече тој.
Шапс понатаму истакна: „Имавме две и пол години тактичка влада од често расеан центар. Ова мора да заврши. Мора да бидеме стратешка влада, трезвена во анализата, а да не ги бркаме следните насловни страници.“
Претходно, британскиот министер за одбрана Бен Валас соопшти дека нема да се кандидира за лидер на Конзервативната партија.
Профилот на Валас беше зајакнат со неговата активност против руската војна во Украина. Тој е омилен меѓу членовите на Конзервативната партија.
Во трката за следен лидер на Конзервативната партија би можеле да учествуваат до 15 кандидати.
Други кои досега поднесоа кандидатури се: поранешниот канцелар Риши Сунак, претседателот на Одборот за надворешни работи Том Тугендат, јавната обвинителка Суела Браверман и поранешниот министер за еднаквост Кеми Баденох.
Во трката се очекува да влезат и министерката за надворешни работи Лиз Трас, поранешниот министер за здравство Саџид Џавид и поранешната министерка за одбрана Пени Мордаунт.
