Велика Британија го казни ТикТок со 12,7 милиони фунти за прекршување на Законот за заштита на податоците на децата

ИСТАНБУЛ (АА) - Кинескиот гигант за социјални медиуми ТикТок е казнет со 12,7 милиони фунти од Канцеларијата на комесарот за информации на Велика Британија (ICO) поради големиот број прекршувања на Законот за заштита на податоците, вклучително и злоупотреба на податоци на деца, пренесува Анадолу.

Канцеларијата соопшти дека околу 1,4 милиони деца во Велика Британија помлади од 13 години се приклучиле на ТикТок во 2020 година, и покрај правилата на земјата кои не дозволуваат децата на таа возраст да креираат профил.

„Законот за заштита на податоците на Велика Британија вели дека организациите кои користат лични податоци кога нудат услуги на информатичкото општество на деца под 13 години мора да имаат согласност од нивните родители или старатели“, се вели во соопштението на Канцеларијата на комесарот за информации на Велика Британија (ICO).

Канцеларијата додаде дека ТикТок не успеал да добие дозвола и да спроведе доволно контроли за да ги идентификува или отстрани малолетните деца од својата платформа.

Големата казна доаѓа откако ТикТок е цел на критики во голем број земји, вклучително и во САД и земјите од Европската Унија, поради стравувањата дека кинеската Влада може да има пристап и да ги искористи податоците од платформата во приватна сопственост.