Велика Британија во 2021 година забележа најголема нето-миграција по Втората светска војна

АНКАРА (АА) - Велика Британија минатата година забележа најголема нето-миграција во периодот по Втората светска војна, објави денеска Канцеларијата за статистика на земјата, јавува Агенција Анадолија (АА).

„Во 2021 година, повеќе од половина милион луѓе дојдоа во Велика Британија отколку што заминаа, соборувајќи го претходниот повоен рекорд од 390.000 поставен во 2015 година“, соопшти Канцеларијата за национална статистика.

„Зголемувањето е поттикнато од голем број бегалци од Авганистан, Хонгконг и Украина на кои им беше дадено право да живеат во земјата“, рече Џеј Линдоп, директорка на Центарот за меѓународна миграција на Заводот за статистика.

„Завршувањето на карантинот во Велика Британија, првиот целосен период по транзицијата од ЕУ, војната во Украина, преселувањето на Авганистанците и новата визна рута за британските државјани на Хонгконг... придонесоа за рекордните нивоа на долгорочна миграција“, рече таа.

Линдоп додаде дека има и други причини зад зголемувањето, како што се поголемиот број на студенти кои пристигнуваат во Велика Британија и луѓе кои мигрираат од семејни причини.

Податоците, исто така, покажаа дека имиграцијата на државјаните на ЕУ останала во голема мера стабилна во 2021 година, што одговара на 21 отсто од вкупната имиграција.

На 26 октомври, британскиот премиер Риши Сунак рече дека сака да види пад на вкупната нето-миграција, но подоцна одби да постави „произволна бројка“.