Бројот на загинати Палестинци во израелските напади на Западниот Брег се зголеми на 122 од 7 октомври

АНКАРА (АА) - Уште двајца Палестинци се убиени денес на Западниот Брег, со што бројот на загинати во израелските напади на окупираната територија од почетокот на тековниот конфликт во Газа се зголеми на 122, соопшти Министерството за здравство, јавува Анадолу.

Во соопштението на Министерството се вели дека 23-годишен маж бил застрелан од израелските сили на влезот од градот Јата, јужно од градот Хеброн.

Според очевидци, Палестинците загинале во судирите меѓу палестинските жители и израелските сили, кои употребиле жив оган и солзавец.

Уште еден Палестинец им подлегна на повредите што ги здоби во напад од израелските доселеници во близина на градот Рамала минатата недела, соопшти Министерството за здравство.

Израелските сили утринава убија четворица Палестинци за време на воена рација во градот Џенин.

Тензиите се зголемени низ Западниот Брег во услови на масовно израелско бомбардирање на блокираниот Појас Газа.

Најмалку 122 Палестинци се убиени, а 1.680 други се приведени од страна на израелската Aрмија од 7 октомври, според палестинските податоци.

Израелската Армија ги прошири своите воздушни и копнени напади врз Појасот Газа, кој е под немилосрдни воздушни напади по ненадејната офанзива на палестинската група Хамас на 7 октомври.

Повеќе од 9.800 луѓе се убиени во конфликтот во Газа, меѓу кои 8.306 Палестинци и повеќе од 1.538 Израелци.