Бројот на загинати Палестинци во Газа се приближува до 37.400, Израел продолжува со нападите

ИСТАНБУЛ (АА) - Бројот на загинати Палестинци во тековната израелска офанзива врз Газа се искачи на 37.396, соопшти денес Министерството за здравство во опколената енклава, јавува Анадолу.

Најмалку 85.523 лица се повредени во нападите, се додава од Министерството.

„Израелските сили убија 24 лица и ранија 71 во пет 'масакри' врз семејства во последните 24 часа“, нагласи Министерството.

Се додава дека многу луѓе сè уште се заробени под урнатините и на патиштата бидејќи спасувачите не можат да стигнат до нив.

Непочитувајќи ја Резолуцијата на Советот за безбедност на Обединетите нации со која се бара итен прекин на огнот, Израел се соочи со меѓународна осуда поради континуираната брутална офанзива врз Газа од нападот на Хамас на 7 октомври 2023 година.

Во текот на осум месеци од почетокот на израелската војна огромни делови од Газа се во урнатини, а има и целосна блокада за храна, чиста вода и лекови.

Израел е обвинет за геноцид пред Меѓународниот суд на правдата, чија последна пресуда му нареди на Тел Авив веднаш да ја прекине својата операција во Рафа, каде што над еден милион Палестинци побараа засолниште од војната пред да започне копнената офанзива врз градот на 6 мај.