Бројот на загинати во интервенциите на безбедносните сили врз протестите во Мјанмар се искачи на 510

КУАЛА ЛУМПУР (АА) - Бројот на луѓе што ги загубија своите животи како резултат на вооружените интервенции на безбедносните сили врз протестите против воениот удар се искачи на 510, пренесува Агенција Анадолија (АА).

Според дневниот извештај што го објави Организацијата за помош на политички затвореници во Мјанмар (AAPP), во последните 24 часа се потврдени уште 51 жртва, односно има најмалку 510 смртни случаи од почетокот на демонстрациите.

Во истиот извештај се наведува дека во земјата се приведени 2.574 лица, а за 120 лица има потерница за приведување.

Исто така во извештајот се наведува дека меѓу жртвите има 14 деца и еден полицаец.

- Воен удар во Мјанмар -

Тензиите во Мјанмар ескалираа поради тврдењата дека на изборите на 8 ноември 2020 година се направени манипулации. Генералштабот на 28 јануари ја повика Владата да ги разјасни обвинувањата за манипулација на изборите.

Армијата на Мјанмар ја презеде власта на 1 февруари и прогласи воена состојба во траење од една година. Беа притворени претседателот Вин Минт, челничката на земјата, Су Чу, како и останатите водечки членови на владејачката партија Национална лига за демократија (НЛД).

Во следните денови, Армијата на Мјанмар изврши рација во партиските штабови на владејачката партија Национална лига за демократија (НЛД), запленувајќи компјутери и документи.

Луѓето во Мјанмар започнаа демонстрации на 6 февруари со барање да се врати демократијата. Над 500 демонстранти ги загубија своите животи во вооружената интервенција на безбедносните сили.

Додека продолжуваат демонстрациите, продолжува и судењето на приведените високи државни функционери пред Воениот суд.