Борел: „Односите на ЕУ со Турција значително подобрени во однос на минатата година“

ОВИЕДО

Жозеп Борел, високиот претставник на ЕУ за надворешна политика и безбедност, изјави дека односите на Блокот со Турција се значително подобрени во текот на минатата година, јавува Агенција Анадолија (АА).

„Имаше многу моменти кога односите за малку се распаднаа“, рече тој на новиот економски форум во Мадрид.

Борел објасни дека откако ја презел улогата на висок претставник за надворешна политика на ЕУ во декември 2019 година, потрошил околу 30 отсто од своето време обидувајќи се да ги „смири“ односите со Турција.

„Имаше многу тензии, но мојата улога е да изградам мостови. Таму каде што има конфликт, сакам да го решам со дијалог и мислам дека сме на многу подобро место со Турција сега отколку пред една година“, нагласи тој.

Борел рече дека неговиот однос со претседателот Реџеп Таип Ердоган е одличен и дека долго време верува дека Турција е „суштинска“ партнерска земја за ЕУ, и покрај тековните проблеми со Грција и Кипарско-грчката администрација.

„Некои луѓе ме критикуваат за тоа дека ги поддржувам Турците“, рече тој, и додаде: „Но јас не сум ниту за, ниту против Турците.“

Тој ги даде овие коментари откако грчкиот амбасадор во Шпанија праша дали неговата визија за Турција се променила откако ја презел својата улога како врвен дипломат на ЕУ.