Блинкен на Блискиот Исток се сретна со челниците на арапските земји за повоеното управување со Појасот Газа

ВАШИНГТОН (АА) - Американскиот државен секретар Ентони Блинкен ги продолжува разговорите за Газа во Саудиска Арабија, јавува Анадолу.

Патувањето беше најавено по телефонскиот разговор меѓу американскиот претседател Џо Бајден и израелскиот премиер Бенјамин Нетанјаху.

Имено, американскиот државен секретар Ентони Блинкен пристигна во Саудиска Арабија каде што ќе учествува на разговори со арапските лидери за повоеното управување со Газа.

Тој, исто така, оваа недела повторно ќе ги посети Израел и Јордан.

Саудиска Арабија е прва станица на долгото патување на Блинкен, каде што тој ќе се обиде да разговара за повоената ситуација во Газа со своите арапски партнери и да изврши притисок врз израелскиот премиер Бенјамин Нетанјаху да преземе поконкретни мерки што ги побара американскиот претседател Џо Бајден.

Блинкен се очекува во Ријад да се состане со високи саудиски лидери и колеги од петте арапски земји Катар, Египет, Саудиска Арабија, Обединетите Арапски Емирати и Јордан за да ги продолжи дискусиите за повоеното управување со Појасот Газа, изјави официјален претставник на Стејт департментот.

Блинкен, исто така, се очекува да разговара со арапските дипломати како Европа би можела да помогне во обновата на малата енклава што целосно беше уништена од шестмесечното израелско бомбардирање.

Разговорите за обнова и управување со Газа траат со месеци, но допрва треба да се воспостави јасен механизам. САД го поддржуваат Израел во неговата борба против Хамас, но Вашингтон не сака Израел повторно да ја окупира областа.

Наместо тоа, тој се залага за план што би вклучувал реформирана палестинска управа со поддршка на арапските држави.

Блинкен, исто така, ќе разговара со саудиските власти за напорите за нормализирање на односите меѓу Саудиска Арабија и Израел и усвојување сеопфатен договор што вклучува договори за заемни одбранбени и безбедносни обврски и нуклеарна соработка.

Во замена за нормализирање на односите, арапските земји и Вашингтон бараат Израел да ја признае палестинската држава, а Нетанјаху постојано го одбива тоа.

Блинкен ќе продолжи кон Израел и Јордан, соопшти синоќа Стејт департментот, но не објави детален распоред.

Предвидено е патувањето да трае до среда. Во Јордан тој разговараше за важноста од зголемување на хуманитарната помош.

Тој ќе се состане со високи јордански претставници и хуманитарни групи во Аман и ќе пренесе информации до Израел на крајот на неделата.

Патувањето е најавено по телефонскиот разговор меѓу американскиот претседател Бајден и израелскиот премиер Нетанјаху за тековните преговори за прекин на израелската офанзива во Појасот Газа во замена за ослободување на заложниците.

Египет, Катар и САД со месеци се обидуваат да постигнат ново примирје меѓу Израел и Хамас, а се зголемува притисокот на јавноста за договор.

Американскиот претседател Бајден, исто така, го повтори своето противење на израелската воена операција во Рафа, Јужна Газа, каде што се засолниле повеќе од еден милион Палестинци.