Rabia İclal Turan
17 Ноември 2023•Ажурирај: 19 Ноември 2023
ВАШИНГТОН (АА) - Американскиот државен секретар Ентони Блинкен го повика Израел итно да преземе чекори за да го запре екстремистичкото насилство од страна на еврејските доселеници врз Палестинците на окупираниот Западен Брег, јавува Анадолу.
Во вчерашниот телефонски разговор со министерот Бени Ганц, член на израелскиот воен кабинет, Блинкен „ја нагласи итната потреба од успешни чекори за деескалација на тензиите на Западниот Брег, вклучително и соочување со порастот на насилството од екстремистите доселеници“.
Според зборовите на Метју Милер, портпарол на Стејт департментот, Блинкен и Ганц разговарале и за тековните напори да се спречи ескалација на конфликтот помеѓу Израел и Хамас и да се обезбеди ослободување на заложниците што се држат во Појасот Газа, вклучително и американски државјани.
За време на разговорот Блинкен нагласи дека САД остануваат посветени на промовирањето на дводржавното решение.
Повикот на Блинкен следуваше откако израелската војска изврши напади на окупираниот Западен Брег, вклучително и во градот Џенин и бегалскиот камп Џенин, што доведе до судири со вооружени Палестинци.
На Западниот Брег се зголемуваат тензиите и судирите помеѓу Палестинците и израелската војска, која ги засили рациите паралелно со зголеменото насилство од страна на доселениците, и војната во Појасот Газа.
