Билансот на загинати во поплавите во југоисточниот дел на Мароко се искачи на 11

РАБАТ (АА) - Бројот на загинати во поплавите предизвикани од обилните врнежи во југоисточниот дел на Мароко се искачи на 11, јавува Анадолу.

Портпаролот на Министерството за внатрешни работи, Рашид Ел-Калифи, даде информации за жртвите во изјава за медиумите.

Ел Калифи рече дека седум лица загинале во провинцијата Тата и по две во Тизнит и Ерахидија поради силните бури и поплави, додека девет лица сѐ уште се водат како исчезнати во Тата, Ерахидија и Тарудант.

Тој, исто така, истакна дека количината на врнежи регистрирана во последните два дена претставува речиси половина од годишните врнежи во регионот.

Поплавите уништија 24 домови, делумно оштетија 16 и предизвикаа штети на 93 патни правци, со што е прекинат транспортот.

Од поплавите погодени се и електрични мрежи, снабдувањето со вода за пиење и телефонските мрежи.

Претходно, градоначалникот на Таманарте во провинцијата Тата, Омар Бехош, изјави дека осум лица загинале, а најмалку 15 се водат како исчезнати поради обилните врнежи од дожд.