Бајден: „Враќањето на Договорот со Иран ќе биде најдобриот начин да се постигне стабилност во регионот“

АНКАРА (АА) - Новоизбраниот американски претседател Џо Бајден изјави дека враќањето на Договорот за иранската нуклеарна програма од 2015 година може да претставува најдобар начин за спречување на трката во вооружувањето на Блискиот Исток, јавува Агенција Анадолија (АА).

Откако Доналд Трамп во 2018 година ги повлече Соединетите Американски Држви (САД) од Договорот, официјално познат како Заеднички сеопфатен акциски план (JCPOA), Бајден изјави дека САД би требало повторно да се приклучат и да го прошират Договорот доколку Техеран возврати со строга согласност.

„Враќањето на Договорот ќе биде најдобриот начин да се постигне стабилност во регионот“, изјави Бајден за колумнистот на „Њујорк тајмс“ (The New York Times), Томас Фридман, во интервју кое беше објавено вчера, додавајќи дека последното нешто што САД го сакаат во регионот е зголемување на нуклеарната способност.

Поранешниот претседател Барак Обама, чиј заменик-претседател беше Бајден, ги укина санкциите за Иран, а за возврат да ја спречи својата нуклеарна програма. Бајден во интервјуто изјави дека Техеран сѐ уште би бил подложен на санкции доколку го откаже Договорот.

Обидот на САД претходно оваа година да воспостави такви санкции, пропадна, бидејќи Вашингтон веќе се имаше повлечено од Договорот.

Новоизбраниот претседател исто така предупреди дека зголемувањето на капацитетот на нуклеарно оружје на Иран ќе предизвика трка во вооружување со другите сили на Блискиот Исток, вклучувајќи ги Саудиска Арабија, Турција и Египет.

Бајден исто така изјави дека не се брза да ги отстрани тарифите врз Кина поставени од страна на Трамп.

„Нема да преземам веднаш каков било чекор, истото се однесува и за тарифите“, изјави Бајден, додавајќи дека најпрво ќе ја набљудува првата фаза од Трговскиот договор потпишан меѓу САД и Кина во јануари, според кој Пекинг треба да купи американски производи во вредност од 200 милијарди долари во текот на две години.

Претставничкиот дом на САД усвои Предлог-закон за отстранување на кинеските компании од американските берзи доколку не ги почитуваат целосно финансиските прописи за транспарентност и ревизија.

Бидејќи Законот беше усвоен во американскиот Сенат во мај, ќе биде предаден во Белата куќа, каде што се очекува Трамп да го потпише.