Darren Lyn
14 Јули 2024•Ажурирај: 16 Јули 2024
ВАШИНГТОН (АА) - Обидот за атентат врз Доналд Трамп на предизборниот митинг во Пенсилванија ја надгради изненадувачки долгата листа на претседатели на САД кои биле жртви на атентати или обиди за атентат низ историјата на САД, пренесува Анадолу.
За последен пат американски претседател беше повреден во обид за атентат пред 43 години, за време на првиот мандат на Роналд Реган. Тој беше застрелан од Џон Хинкли Џуниор на 30 март 1981 година, пред хотелот Хилтон во Вашингтон, што резултираше со скршено ребро и дупнати бели дробови. Реган беше опериран итно, закрепна и повторно го освои вториот мандат во Белата куќа.
Најпознатото убиство на американски претседател во модерното време беше пукањето врз Џон Ф. Кенеди на 22 ноември 1963 година во Далас, Тексас. Кенеди се возел во претседателската колона во лимузина со отворен покрив, кога бил застрелан во задниот дел од главата и убиен од Ли Харви Освалд кој пукал од шестиот кат на магацин за школски книги во Тексас.
Кенеди е еден од четворицата убиени американски претседатели. Останатите тројца се Абрахам Линколн, Џејмс Гарфилд и Вилијам Мекинли, наведе американската јавна телевизиска мрежа „PBS“.
Линколн беше убиен на 15 април 1865 година, по помалку од една недела по официјалното завршување на Граѓанската војна. Тој бил на настап во театарот Форд во Вашингтон, кога Џон Вилкс Бут смртно го застрелал во задниот дел од главата.
На 2 јули 1881 година, Гарфилд бил застрелан двапати во грб од Чарлс Гуто додека претседателот се подготвувал да се качи на воз на железничка станица во Вашингтон. Гарфилд живееше речиси два месеци по атентатот, но на крајот почина од здобиените рани.
На 6 септември 1901 година, Мекинли беше застрелан двапати во градите од непосредна близина во Бафало, а убиецот беше Леон Чолгош. Претседателот го преживеа нападот, но почина осум дена подоцна, откако и подлегна на гангрена предизвикана од раните.
Обидите за убиство на американски претседатели датираат уште од пред речиси два века.
Првиот се случил на 30 јануари 1835 година, кога Ричард Лоренс се обидел да го застрела претседателот Ендрју Џексон откако тој го напуштил конгресниот погреб во зградата на Капитол, но го промашил.
На 14 октомври 1912 година, Теодор Рузвелт бил застрелан во градите од Џон Шранк во Милвоки, додека бил на пат на предизборен говор. Историските записи укажуваат на фактот дека листовите хартија од говорот на Рузвелт на 50 страници, во комбинација со метална футрола за очила, го забавиле куршумот и му го спасиле животот.
На 15 февруари 1933 година, Френклин Д. Рузвелт беше застрелан од Џузепе Зангара откако одржа говор во Мајами, Флорида, само 17 дена пред неговата прва претседателска инаугурација. Пет испукани куршуми го промашиле новоизбраниот претседател, а Рузвелт не бил повреден при обидот за атентат, но истрелите биле фатални за градоначалникот на Чикаго, Антон Чермак.
Хари Труман беше застрелан од двајца порторикански националисти на 1 ноември 1950 година, за време на реновирањето на Белата куќа. Претседателот се спаси, но убиен е полицаец при обидот за атентат.
Џералд Форд се соочи со два обиди за атентат во 1975 година. Првиот се случи на 5 септември во Сакраменто, Калифорнија, кога Линет Фром се обиде да го убие. Вториот се случи 17 дена подоцна кога Форд го посети Сан Франциско на 22 септември. Сара Џејн Мур пукаше кон Форд, но промаши. Форд не беше повреден во ниту еден од обидите за атентат.
На 10 мај 2005 година, Џорџ В. Буш држеше говор на Плоштадот на слободата во Тбилиси, Грузија, кога Владимир Арутјуњан фрли граната на подиумот. Гранатата не експлодираше и претседателот не беше повреден, но при приведувањето Арутјуњан убил агент на американското Министерство за внатрешни работи.
Оскар Рамиро Ортега-Ернандез испука најмалку седум куршуми кон Белата куќа на 11 ноември 2011 година, за време на првиот мандат на Барак Обама. За време на обидот за атентат, ниту претседателот, ниту првата дама не биле во Белата куќа.
Се случија и два големи атентати и обиди за атентат врз политичари кои не беа претседатели.
На 5 јуни 1968 година, Сирхан Сирхан смртно го застрела Роберт Ф. Кенеди, братот на претседателот Џон Ф. Кенеди, во хотелот Амбасадор во Лос Анџелес. Роберт Кенеди беше водечки кандидат на претседателските избори на Демократската партија во 1968 година.
Поранешниот гувернер на Алабама Џорџ Валас беше водечки демократски претседателски кандидат во 1972 година кога Артур Бремер го застрела четири пати за време на кампањата што ја водел во трговскиот центар во Лорел, сојузна држава Мериленд. Валас бил застрелан во стомакот и градите и бил парализиран од половината надолу до крајот на животот. Обидот за атентат и последиците од повредите ставија крај на неговата кандидатура за претседател.
