Антирежимските вооружени групи во Сирија го зазедоа градот Хама

ХАМА (АА) - Антирежимските вооружени групи во Сирија го зазедоа градот Хама, заземајќи го центарот на градот, ја зацврстија контролата и ги принудија силите на режимот да го отстапат градот, јавува Анадолу.

Антирежимските групи воспоставија целосна контрола во центарот на градот откако ги зазедоа населбите Мезариб, Санаји и Арбаин.

Хасан Абдул Гани, командант на Одделот за воени операции формиран од антирежимските групи, на социјалната мрежа X напиша: „Криминалецот Хафез ал Асад влезе во градот со тенкови и го украде од неговиот народ, а денес влеговме во него со тенкови и го вративме на нејзиниот народ.“

Во писмената изјава, Армијата на сирискиот режим најави повлекување од градот и прераспоредување во периферијата откако антирежимските групи ја презедоа контролата врз градот.

Антирежимските групи предводени од Хајат Тахрир ал-Шам, кои се судираат со силите на режимот на Асад од 27 ноември, продолжуваат со напредувањето во провинцијата Хама.

Руските авиони ги поддржуваат силите на сирискиот режим додека продолжуваат жестоките судири.

Антирежимските вооружени групи соборија еден од двата хеликоптери кои полетаа од воениот аеродром Хама околу центарот на градот. Другиот хеликоптер кој беше погоден, слета принудно.

Групите се судрија со силите на режимот западно од центарот на градот Хама, ги зазедоа селата Ерзе, Ал-Вашија, Кафртун и Јадгун и се упатија кон воениот аеродром Хама југозападно од центарот на градот.

На 30 ноември, антирежимските групи зазедоа голем дел од централниот дел на Алепо по брзиот напредок во неговите рурални области.

Групите, исто така, го зазедоа градот Кан Шајхун, добивајќи речиси целосна контрола врз областа Идлиб.

Опозициската Сириска национална армија, пак, на 1 декември ја започна операцијата „Зора на слободата“ против терористичката организација ПКК/ЈПГ, ослободувајќи го градот Тел Рифат.