Американските власти соопштија дека би можеле да испратат уште ‘илјадници’ војници на границата со Мексико

ВАШИНГТОН (АА) - Американските власти соопштија дека се очекува „илјадници“ војници да бидат распоредени на границата со Мексико како дел од најавените мерки за спречување мигрантите да преминат во Соединетите држави.

Американските власти, кои побараа да останат анонимни од безбедносни причини, за Асошиејтед прес (АП) зборуваа во врска со засилувањата што ќе бидат испратени на јужната граница на земјата.

Официјални лица рекоа дека во наредните денови се очекува да бидат распоредени повеќе војници на границата за да ги спречат мигрантите кои доаѓаат од Мексико, додавајќи дека точниот број на дополнителни војници што ќе бидат распоредени не е сигурен, но се предвидува дека бројот ќе биде во „ илјадници“.

Властите соопштија дека војниците што ќе бидат распоредени би можеле да бидат од единици како што се активните безбедносни сили и од Националната гарда.

Официјалните лица истакнаа дека војниците може да бидат избрани од копнените, воздухопловните и поморските сили и дека поголемиот дел од дополнителните војници би можеле да бидат распоредени долж границата на сојузната држава Тексас со Ел Пасо, а остатокот ќе биде распореден на поширока област на границата почнувајќи од Сан Диего, во сојузната држава Калифорнија.

Американското Министерство за одбрана (Пентагон) објави дека ќе распореди дополнителни 1.500 војници во регионот со цел да се зголеми безбедноста на границата меѓу САД и Мексико.

Вршителот на должноста секретар за одбрана на САД, Роберт Салесес, изјави дека овој потег ќе претставува зголемување од 60 % на активните безбедносни сили во регионот откако американскиот претседател Доналд Трамп положи заклетва на 20 јануари.