Американскиот Стејт департмент: „Нашиот став кон идните влади во Авганистан ќе зависи од постапките на талибанците“

ЊУЈОРК (АА) - Портпаролот на американскиот Стејт департмент, Нед Прајс, рече дека ставот на САД кон идните влади во Авганистан ќе зависи од постапките на таа влада, и од дејствувањето на талибанците, пренесува Агенција Анадолија (АА).

На брифингот со новинарите, Прајс истакна дека целиот персонал, вклучително и американскиот амбасадор во Кабул, се донесени на Меѓународниот аеродром „Хамид Карзаи“, дека тие се безбедни и дека Министерството за одбрана на САД се обидува да воспостави безбедна средина за да можат воените и комерцијалните летови да продолжат.

Наведувајќи дека САД се во координација со своите меѓународни партнери, Прајс изјави дека американскиот државен секретар Ентони Блинкен имал телефонски разговор со голем број министри за надворешни работи, вклучувајќи го и неговиот турски колега Мевлут Чавушоглу.

На прашањето дали САД ќе продолжат да го признаваат претседателот Ашраф Гани, кој ја напушти земјата, Прајс рече дека не постои нормално предавање на администрацијата на земјата и дека САД работат со меѓународната заедница за да препознаат кој е лидер во Авганистан.

„Во Доха продолжуваме да се среќаваме со претставниците на талибанците. Американската армија, исто така, воспостави комуникација со талибанците на теренот во Кабул“, рече Прајс и додаде: „Нашиот став кон идните влади во Авганистан ќе зависи од постапките на таа влада, и дејствијата на талибанците.“

Прајс, исто така, нагласи дека САД нема да соработуваат со влада во Авганистан која не ги почитува основните човекови права и која во своите редови има терористи.

Истакнувајќи дека САД ќе го задржат своето дипломатско присуство на Меѓународниот аеродром „Хамид Карзаи“ сè додека е безбедно, Прајс рече дека на тој начин голем број авганистански државјани кои им помогнале на САД ќе можат да бидат евакуирани од земјата.