ИСТАНБУЛ (АА) - Американскиот Сенат го отфрли предлог-законот со кој се бараше ограничување на овластувањата на претседателот Доналд Трамп за водење војна против Иран без одобрение од Конгресот, јавува Анадолу.

Предлогот, чија цел беше да се стави под контрола воената офанзива на Трамп врз Иран, беше ставен на гласање во Сенатот на иницијатива на демократите. Законот беше отфрлен со 53 гласа „против“ и 47 гласа „за“.

„Не ги знаеме целите на Доналд Трамп. Не ја знаеме неговата временска рамка. Не знаеме ниту како изгледа победата во неговите очи“, изјави лидерот на демократите во Сенатот, Чак Шумер, пред гласањето, пренесува „Гардијан“.

Ранд Пол беше единствениот републиканец кој ја поддржа мерката, додека Џон Фетерман беше единствениот демократ кој гласаше против неа.

Ова гласање претставува втор обид на демократите да го принудат Конгресот да заземе став за тековната отворена американско-израелска воена кампања што започна кон крајот на минатиот месец.

Според „Резолуцијата за воени овластувања“ од 1973 година, американскиот претседател е должен да бара одобрение од Конгресот пред да објави војна на која било земја и налага претседателот однапред да го извести законодавното тело пред да преземе таков чекор.

САД и Израел ја продолжуваат заедничката офанзива врз Иран што започна на 28 февруари, во која досега загинаа околу 1.300 луѓе, вклучувајќи го и тогашниот врховен водач, ајатолахот Али Хамнеи.

Иран возврати со напади со беспилотни летала и ракети насочени кон Израел, Јордан, Ирак и земјите од Заливот каде што се наоѓаат американски воени бази, предизвикувајќи човечки жртви и штети на инфраструктурата, истовремено нарушувајќи ги глобалните пазари и авиосообраќајот.