ИСТАНБУЛ (АА) – Амбасадата на Соединетите Американски Држави (САД) во Ријад денес упати апел до американските државјани да ја разгледаат можноста за напуштање на Саудиска Арабија доколку постојат безбедни услови за тоа, поради тековната ескалација во регионот, јавува Анадолу.

Во предупредување објавено на американската платформа за социјални медиуми Х, амбасадата соопшти дека „внимателно ја следи“ ситуацијата на Блискиот Исток и редовно доставува ажурирани информации за да им помогне на американските државјани да донесат одлуки за сопствената безбедност.

„Апелираме до американските државјани да ја напуштат Саудиска Арабија преку комерцијални летови доколку постојат безбедни услови за тоа”, се наведува во соопштението.

Се додава дека воздушниот простор на Саудиска Арабија е отворен, но „со чести ограничувања на воздушниот сообраќај поради континуираните закани од ракети и беспилотни летала“.

До оние што ќе одлучат да останат во Саудиска Арабија, амбасадата апелираше строго да се придржуваат кон насоките на националниот систем за рано предупредување на кралството, притоа предупредувајќи дека тој не е секогаш доследен во навременото доставување на известувањата.

Регионалната ескалација продолжува да се разгорува откако САД и Израел на 28 февруари започнаа заедничка офанзива во Иран, во која досега се убиени околу 1.300 лица, меѓу кои и тогашниот врховен лидер Али Хамнеи.

Иран возврати со напади со беспилотни летала и ракети насочени кон Израел, Јордан, Ирак и земјите од Заливот каде што се стационирани американски воени бази, предизвикувајќи човечки жртви и штета на инфраструктурата, истовремено дестабилизирајќи ги глобалните пазари како и авиосообраќајот.