Американскиот секретар за одбрана не го поддржува предлогот на Трамп за ангажирање на Војската за протестите

ВАШИНГТОН (АА) - Американскиот секретар за одбрана, Марк Еспер, изјави дека не го поддржува предлогот на американскиот претседател Доналд Трамп за активирање на Законот за ангажирање на војската во задушувањето на масовните протести во земјата поради смртта на Џорџ Флојд , јавува Агенција Анадолија (AA).

„Можноста за ангажирањето на активните вооружени сили во улога за спроведување на законот треба да се искористи само во краен случај, и тоа само во најнезгодните и најтешки ситуации. Сега не сме во ниту една од овие ситуации. Јас не поддржувам активирање на Законот", рече Еспер за време на брифингот во Пентагон.

Трамп во понеделникот изјави дека е подготвен да испрати воени сили за да стави крај на насилните протести кои избувнаа по смртта на Флојд, Афроамериканец кој почина по бруталното апсење во Минеаполис.

Американскиот претседател на тој начин изрази подготвеност да се повика на Законот за побуна од 1808 година, што ќе му даде овластување да ја користи војската во спроведување на законот и редот на улиците.

САД од минатата недела се средиште на масовни протести поради полициската бруталност за време на апсењето на Флојд. Инцидентот е снимен со мобилен телефон, а неговото прикажување предизвика бран протести и надвор од Соединетите Американски Држави (САД).