Американскиот државен секретар разговараше со претседателот на Нигер

ДУАЛА (АА) - Американскиот државен секретар Ентони Блинкен денес разговараше со претседателот на Нигер, Мохамед Базум, кој моментно се спротивставува на обидот за државен удар организиран од воена фракција, и ја изрази поддршката на Вашингтон за демократијата во таа западноафриканска земја, јавува Анадолу.

„Му кажав за нашата поддршка за демократски избраниот претседател на Нигер. САД ги осудуваат напорите за насилно соборување на уставниот поредок на Нигер и нагласуваат дека нашето партнерство зависи од стремежот кон демократско владеење“, напиша Блинкен на Твитер.

Во Нигер, доцна синоќа, војници се појавија на националната телевизија и најавија соборување на претседателот Базум. Тие се нарекуваат Национален совет за домашна безбедност (CLSP).

Според соопштението на полковник-мајорот Амаду Абдрамане, Базум бил разрешен, а Уставот бил суспендиран поради влошената безбедносна ситуација во земјата и социоекономската криза.

„Полициски час ќе биде воведен меѓу 22 и 5 часот по локално време, а сите граници се затворени“, се додава во соопштението.

Неколку африкански и западни лидери, како и Обединетите нации, ги осудија актуелните настани во Нигер, повикувајќи ги војниците вклучени во обидот за пуч да се вратат во своите касарни.

Генералниот секретар на ОН, Антонио Гутереш, разговараше и со Базум, за кого се наведува дека е во добра здравствена состојба под заштита на Националната гарда, која е подготвена да ги нападне припадниците на претседателската гарда вклучени во обидот за пуч.

„Тешко заработените придобивки ќе бидат зачувани. Сите Нигерци кои ја сакаат демократијата и слободата ќе се погрижат за тоа“, напиша Базум на Твитер денес.

Привремениот премиер на Нигер, Хасуми Масуду, го осуди обидот за државен удар, зборувајќи денес за „Франс24“ дека пучистите не чекале да заврши процесот на посредување започнат во средата од Махамаду Исуфу, претходникот на Базум, и нигерискиот претседател Ахмед Тинубу, кој е и претседател на Економската заедница на западноафриканските држави (ECOWAS).

„Нигериска делегација пристигна да посредува, како и поранешниот претседател Исуфу. Сепак, пред да се заврши посредувањето пучистите прогласија преземање. Веруваме дека не постои свршен чин: легалната и легитимната моќ е на Базум. Дојде до обид за пуч што не можеме да го прифатиме“, изјави Масуду.

Според неговите зборови, во пучот не била вклучена целата војска, како ниту началникот, кој не се огласи.

Во главниот град Ниамеј денес беше мирно по продемократските протести претходниот ден.

„Спиев многу малку во текот на ноќта, што е нормално со оглед на околностите. Утринава останав дома бидејќи ни рекоа да не излегуваме. Нашата организација нѐ советуваше да не излегуваме. Работиме од дома. Но релативно е мирно“, изјави телефонски за Анадолу локален жител, кој не сакаше името да му биде изнесено во јавност поради лична безбедност.