Американски војници информирани дека војната со Иран го има како цел „Армагедон“, тврди невладина организација

ВАШИНГТОН (АА) - На американските војници во сите гранки од војската им било кажано од нивните команданти дека војната на САД и Израел против Иран има цел да го предизвика библискиот „крај на светот“, или Армагедон, се наведува во поплаките поднесени до американското регулаторно тело, јавува Анадолу.

„Утринава нашиот командант го отвори брифингот за борбена подготвеност со апел да не се плашиме од она што се случува со нашите борбени операции во Иран во моментов“, вели еден подофицер во поплаката пратена преку е-пошта до Фондацијата за воена верска слобода (МРФФ).

„Тој нè повика да им кажеме на нашите трупи дека ова е ’дел од божјиот свет план‘ и конкретно се осврна на голем број делови од Книгата на Откровението што се однесуваат на Армагедон и претстојното враќање на Исус Христос.“

МРФФ е непрофитна организација посветена на обезбедување на верските слободи за припадниците на американската војска.

Офицерот што се обратил до групата вели дека пораката ја напишал во свое име и во име на уште 15 члена на неговата единица – вклучително и најмалку 10 други христијани – кои биле стационирани во регионот во функција на „подготвеност за поддршка“.

Меѓу другите членови биле идентификувани едно лице со еврејска и едно со муслиманска вероисповед.

Анадолу доби копија од поплаката од МРФФ откако независниот новинар Џонатан Ларсен прв извести за случајот. Оваа порака е само една од над 200 што фондацијата ги примила од повеќе од 50 воени единици откако во саботата американскиот претседател Доналд Трамп го објави почетокот на силните напади врз Иран.

Трамп во неколку наврати даваше различни изјави за целите на војната. Во саботата, во кратко телефонско интервју за „Вашингтон пост“, тој рече дека неговата намера е да им донесе „слобода“ на Иранците – што се толкува како директна најава за промена на режимот.

Целите се сменија во текот на следните денови, дури и кога Трамп ги повика Иранците да ја „вратат својата земја“ од револуционерната Влада што ја води земјата од 1979 година.

Мисијата на САД во Иран, како што сега е дефинирана, е елиминирање на иранската програма за балистички ракети и морнарицата, прекинување на мрежата на регионални „прокси групи“ и обезбедување дека Техеран никогаш нема да развие нуклеарно оружје. Иран долго време ги отфрла овие обвинувања.

Офицерот, чиј идентитет е скриен поради страв од одмазда од Пентагон, истакна дека командантот на единицата изјавил дека Трамп „бил избран од Исус за да го запали сигналниот оган во Иран што ќе го предизвика Армагедон и ќе го означи неговото враќање на Земјата“.

Верските тонови се силно присутни во израелско-американските напади. Еден ден по почетокот на офанзивата, израелскиот премиер Бенјамин Нетанјаху се повика на заповед од Тората, споредувајќи го иранскиот режим со антички библиски непријател – Амалек.

„Во делот од Тората за оваа недела читаме: ’Потсетете се што ви направи Амалек.‘ Ние паметиме – и дејствуваме“, изјави тој при посетата на локацијата погодена од иранска ракета.

Амалеците во хебрејската Библија се опишани како упорен непријател на Израелците, поврзани со заповедта за нивно целосно бришење од сеќавањето.

- Зголемена религиозна реторика: „Непосредна закана“

Мајки Вајнштајн, претседател на МРФФ и поранешен офицер на военото воздухопловство, вели дека секретарот за одбрана Пит Хегсет ги урнал долгогодишните бариери меѓу црквата и државата во Пентагон.

„МАГА го уништи ова. Нивното одобрено решение е да бидеш хетеросексуалец, белец, христијанин и маж. Тоа е доволно лошо во училиштата, но кога ќе го најдете таму каде што е нуклеарното оружје, ласерски наведуваните ракети и дроновите, тоа е апсолутна и непосредна закана за националната безбедност на нашата земја и светот“, изјави Вајнштајн.

Тој посочи дека Хегсет вовел редовни месечни молитвени собири во Пентагон на кои неодамна бил Даг Вилсон, екстремно десничарски христијански националист кој ја бранел практиката на ропство и повикувал на укинување на правата на жените.

Според Вајнштајн, ваквото наметнување на христијанскиот национализам на Пентагон директно ги загрозува кохезијата и моралот на трупите.

„Бројот на поплаки расте. Сега кога мразот е скршен, преплавени сме со барања за помош“, заклучи Вајнштајн.