Американската администрација за лекови одобри лек што ја забавува Алцхајмеровата болест

Американската агенција за храна и лекови (ФДА) одобри нов лек за кој се покажа дека ја забавува Алцхајмеровата болест, пренесува Агенција Анадолија (АА).

ФДА објави дека лекот наречен „Лекемби“ ќе им се препишува на пациенти со лесни или рани фази на болеста.

Лекот, одобрен од ФДА за употреба, е прв од ваков вид што покажува знаци на забавување на влошувањето на меморијата и размислувањето.

Но, експертите сметаат дека доцнењето на когнитивното влошување трае само неколку месеци.

„Овој лек не е лекување. Тоа не го спречува влошувањето на состојбата на пациентот, само го забавува прогресот на болеста“, изјави неврологот Џој Снајдер од Универзитетот во Вашингтон за „Ен-би-си“ (NBC).

Од друга страна, експертите укажуваат на несаканите ефекти што лекот може да ги предизвика, како што е церебралниот едем или потребата од третман со инфузија двапати месечно.

Според соопштеното, едногодишното лекување на Алцхајмерова болест со „Лекемби“, произведен од јапонската фирма „Еисаи“ и американскиот партнер „Биоген“, ќе чини приближно 26.500 долари.

Се смета дека во САД има околу 6 милиони пациенти со Алцхајмерова болест.