Ruslan Rehimov
01 Ноември 2020•Ажурирај: 02 Ноември 2020
БАКУ
Претседателот на Азербејџан, Илхам Алијев, истакна дека ерменскиот претседател Никол Пашинјан е одговорен за продолжувањето на војната во Нагорно Карабах и за загубените животи од двете страни, јавува Агенција Анадолија (АА).
Алијев го прими на средба министерот за надворешни работи, Мевлут Чавушоглу, кој во Баку се наоѓа поради остварување различни средби.
Азербејџанскиот претседател говореше за операцијата што азербејџанската Војска ја спроведе за спасување на своите територии, и рече дека ерменскиот премиер Пашинјан испратил писмо до рускиот претседател Владимир Путин од кого побарал помош.
Според Алијев, ова писмо на Пашинјан покажува дека го прифатиле нивниот пораз, а од друга страна дека не сакаат целосно да се предадат.
Алијев истакна дека Пашинјан е одговорен за продолжувањето на војната и за загубените животи од двете страни.
„Најсоодветна опција е Ерменија да прогласи пораз и да ја повлече својата војска од нашите територии, како и прашањето да се реши на маса. Веќе се реализира решението на прашањето. Азербејџан сам ги спроведува резолуциите на Советот за безбедност на Обединетите нации, и поголемиот дел од нив ги реализираше. Се надевам дека и останатите делови ќе се спроведат и дека ќе се осигури територијалниот интегритет на нашата земја“, рече Алијев.
Тој упати благодарност до братскиот турски народ за покажаната поддршка, нагласувајќи дека турските медиуми, ризикувајќи го својот живот дење и ноќе, работат во регионот и дека благодарение на турските медиуми светот ги видел случувањата во овој регион.
Од друга страна, турскиот министер Чавушоглу рече дека во Баку дошол по инструкции на турскиот претседател Реџеп таип Ердоган, и додаде: „Нашиот претедател ни даде инструкции да не го оставаме сам братски Азербејџан во овој процес.“
„Се гордееме со вашите успеси на терен. На целиот свет му ја покажавте турската моќ“, истакна Чавушоглу.
Шефот на турската дипломатија истакна дека Турција одблизу ги следи настаните во Нагорно Карабах и дека иако Азербејџан е во предност и на терен и од законски аспект, оваа земја на целиот свет му ја покажала својата зрелост и дека е земја и народ што имаат доверба во себе и во врска со примирјето и на маса.
„Постојат страни кои го сфаќаат ова, кои не го сфаќаат ова, и кои не сакаат да го сфатат ова. Секој гледа што прави Ерменија и дека секој пак го прекршува примирјето, но има голем број страни кои не сакаат да го истакнат тоа. Затоа, уште повеќе ќе ја зајакнеме солидарноста меѓу нас и ќе продолжиме да го штитиме нашето право“, рече тој.
На средбата беа присутни министерот за надворешни работи на Азербејџан, Џејхун Бајрамов, советникот на азербејџанскиот претседател, Хикмет Хаџијев, и амбасадорот на Турција во Баку, Еркан Озорал.
