Burç Eruygur
09 Јули 2023•Ажурирај: 10 Јули 2023
ИСТАНБУЛ (АА) - Азербејџан денес соопшти дека Ерменија се обидела да изврши извидувачки летови над Автономната Република Нахчиван и регионот Лачин, пренесува Анадолу.
„Квадкоптер на илегалните ерменски вооружени групи (исто така) се обиде да изврши извидувачки летови над позициите на нашите единици лоцирани во правец на селото Тагаверд во дистриктот Хоџавенд“, соопшти азербејџанското Министерство за одбрана.
Во соопштението се наведува дека обидите биле спречени по итните мерки преземени од азербејџанската војска.
Се наведува дека ерменските сили отвориле оган врз воените позиции на азербејџанската војска во Калбаџар и Автономната Република Нахчиван.
„На 8 јули, од 22:35 до 23:10 часот, пукано е врз позициите на нашата армија во областите Шуша и Калбаџар од припадници на илегалните ерменски вооружени групи на територијата на Азербејџан, каде што моментно се стационирани руските мировници“, се вели во соопштението и се додава дека се преземени одмазднички мерки.
Понатаму се наведува дека активностите на илегалните ерменски вооружени групи, кои се обидуваат да „прошират патишта за снабдување во различни правци, копаат ровови, подготвуваат засолништа и инсталираат надзорни камери на борбените позиции“, се запрени со контрамерки преземени од азербејџанските сили.
Односите меѓу двете поранешни советски републики беа напнати од 1991 година, кога ерменската војска го окупираше Нагорно-Карабах, територија меѓународно признаена како дел од Азербејџан и седум соседни региони.
Во есента 2020 година, во 44-дневни борби, Азербејџан ослободи неколку града, села и населби од ерменска окупација. Мировниот договор постигнат со посредство на Русија се слави како триумф во Азербејџан.
И покрај тековните разговори за мировен договор меѓу Баку и Ереван, тензиите меѓу соседните земји ескалираа во последниве месеци поради коридорот Лачин, кој служи како единствена копнена траса што ѝ обезбедува пристап на Ерменија до Карабах.
