ЖЕНЕВА (АА) – Климата на земјата сега е „повеќе надвор од рамнотежа од кога било во историјата“, соопшти денес Светската метеоролошка организација (ВМО), предупредувајќи на долгорочните последици поттикнати од растечката концентрација на гасови со ефект на стаклена градина, јавува Анадолу.

Периодот од 2015 до 2025 година бил најтоплиот 11-годишен период во историјата, според извештајот на ВМО, во врска со состојбата на глобалната клима во 2025 година.

Со околу 1,43 степени Целзиусови над просекот во периодот од 1850 до 1900 година, 2025 година е рангирана како втора или трета најтопла година.

Екстремните временски настани, вклучувајќи ги интензивните горештини, поројните дождови и тропските циклони, предизвикале широко распространети прекини и ја истакнале ранливоста на меѓусебно поврзаните економии и општества, се вели во извештајот.

Океаните продолжуваат да се загреваат и апсорбираат јаглероден диоксид, примајќи количество топлина еквивалентно на околу 18 пати од годишната потрошувачка на енергија на човештвото, во секоја година во изминатите две децении.

Морскиот мраз на Арктикот достигна нивоа близу рекордниот минимум, се наведува во извештајот, додека мразот на Антарктикот е на третото најниско ниво во историјата на мерењата, со континуирано топење на глечерите.

„Состојбата на глобалната клима е во вонредна состојба. Планетата земја се турка надвор од нејзините граници. Секој клучен климатски индикатор свети црвено”, изјави генералниот секретар на ОН, Антонио Гутереш.

„Човештвото штотуку ги издржа 11-те најтопли години во историјата. Кога историјата се повторува 11 пати, тоа веќе не се смета за случајност. Туку е повик за акција”, додаде тој.

По објавувањето на извештајот, Светскиот фонд за дивиот свет предупреди дека светот не ја зголемува брзината на климатската акција доволно, и покрај сигналите дека климатскиот систем на Земјата „влегува во неистражена територија“.

Мануел Пулгар-Видал, глобален лидер за клима и енергија во Светскиот фонд за дивиот свет, во изјава нагласи дека балансирањето на климата е сè уште можно; сепак, прозорецот за тоа да се направи пред „климатските влијанија да излезат од контрола, брзо се затвора”.

„Прозорецот за климатска акција не се затвора сам од себе, тој се затвора поради одложувањето”, предупреди тој.

Според Пулгар-Видал, светот го има „сè она што му е потребно за да ги спроведе решенијата, но претворањето на ветувањата во реални резултати бара волја за тоа да се направи“.

„Ако сме сериозни во намерата да го ограничиме надминувањето на границата од 1,5 степени Целзиусови, во оваа деценија, мораме да се фокусираме на извршувањето, а не на дебатата“, рече тој и заклучи: „Секоја година одложување ги зголемува трошоците и го продлабочува нарушувањето.“