„Хафтар ја напушти Москва без да го потпише договорот за прекин на огнот во Либија“

МОСКВА (АА) - Рускиот министер за надворешни работи, Сергеј Лавров, изјави дека едната страна во либискиот конфликт го потпишала договорот за прекинот на огнот, но дека другата страна ја напуштила Москва утринава без да даде потпис, јавува Агенција Анадолија (АА).

Вчера во Москва беше одржан состанок на кој се дискутираше за прекинот на огнот во Либија и за започнување политички дијалог.

„По повеќе од осум часа разговори, шефот на либиската Влада на национална спогодба (GNA), Фајез ал Сараџ, го потпиша договорот, но командантот Калифа Хафтар замина за Либија без да го потпише договорот, иако побара во текот на ноќта да размислат во врска со договорот“, изјави Лавров.

„За време на посетата на претседателот Владимир Путин во Истанбул на 8 јануари, Русија и Турција го иницираа договорот за прекинот на огнот во Либија“, изјави Лавров на прес-конференцијата во Шри Ланка.

„Како продолжение на оваа иницијатива, вчера во Москва се одржа состанок на либиските претставници со учество на министрите за надворешни работи и одбрана на Руската Федерација и Република Турција. Ние ќе ги продолжиме нашите напори во оваа насока, но конечниот резултат сè уште не е постигнат.“

Претходно, извор од либиската делегација изјави дека Хафтар е загрижен за условите за распуштање на вооружените групи во договорот.

На 12 јануари, завојуваните страни на либискиот конфликт најавија прекин на огнот како одговор на повикот на турскиот претседател Ердоган и рускиот претседател Путин.

Од соборувањето на починатиот либиски лидер Моамер Гадафи во 2011 година, во Либија се појавија две места на моќ: едно во источна Либија, поддржано главно од Египет и Обединетите Арапски Емирати (ОАЕ), и друго во Триполи, кое е признаено од ОН и меѓународната заедница.

Осврнувајќи се на прашањата за Сирија, Лавров посочи на две територии во земјата - североисточна, каде што САД одржуваат „нелегитимно присуство“, и покраината Идлиб, каде што беше постигнат нов прекин на огнот во текот на викендот.

„Инаку, контролата на сириската Влада над Сирија постојано се шири“, рече Лавров.

- Русија нема да се меша во тензиите меѓу Иран и САД -

Во врска со ситуацијата во Персискиот Залив, Лавров изјави дека ескалацијата расте таму откако САД тврдеа дека Иран е „коренот на злото“ во регионот.

„Откако САД се повлекоа од нуклеарниот договор со Иран од 2015 година“, рече тој, „започна да се казнува и санкционира секој што легитимно тргуваше со Иран, што не беше корисно ниту за деескалацијата. Кулминација на ова беше атентатот [минатата недела од страна на САД] на генералот Касим Сулејмани, кој беше во официјална посета на Ирак и тоа надминува какви било норми.“

Лавров додаде дека Русија одбива ескалација од која било страна, но нема да интервенира во односите на САД и Иран во „физичка смисла“.

Лавров ги повика двете држави да започнат дијалог без никакви предуслови, велејќи дека Русија ќе помогне доколку е потребно.