Muhammet Tarhan
22 Декември 2023•Ажурирај: 23 Декември 2023
АНКАРА (АА) - Израел ги уништува болниците и медицинската инфраструктура во Појасот Газа преку континуиран шаблон на напади, првин цели кон околината на болниците со директни напади, па опсада и окупација, јавува Анадолу.
Израелската армија продолжува до нападите врз болниците, каде што илјадници раселени Палестинци, вклучително и повредени и болни, побараа засолниште од 7 октомври.
„Форензичка архитектура“, истражувачка група со седиште во Лондон, анализираше стотици извештаи објавени од медиуми како Ал Џезира, Ал Араб и новинската агенција Шехаб, за нападите врз болниците, околината на болниците и медицинската инфраструктура во северниот дел на Појасот Газа.
Анализата хронолошки ги претстави дејствата на Израел што ги направија болниците нефункционални како последица на бомбардирањата, користејќи мапа со помош на анимирана графика.
Од 2 ноември Израел онеспособи половина од болниците.
На 14 октомври медиумите објавија дека надвор од функција се две болници.
На 31 октомври е бомбардирана околината на болниците, а израелските сили го окупираа теренот. Беа бомбардирани Индонезиската болница, Ал-Шифа, детските болници Ал-Рантиси, Ал-Кудс, баптистичката болница Ал-Ахли, Турската болница и Ал-Вафа.
Поради воените активности во областите во северниот дел на Газа, пет болници - Ал-Кудс, Ал-Шифа, Ал-Рантиси, Камал Адван и Индонезиската - станаа засолништа за илјадници принудно раселени Палестинци.
„Во периодот од 2 до 7 ноември воздушните напади директно беа насочени кон две болници, принудувајќи ги да прекинат со работа.“
„Извештаите од 14 ноември укажуваат на тоа дека тие биле под опсада од израелската војска и се принудени да прекинат со работа“, се вели во извештајот.
Се вели дека на 24 ноември Индонезиската болница, Ал-Шифа и Ал-Рантиси биле окупирани од израелската војска и принудени да прекинат да даваат медицински услуги.
„Светската здравствена организација (СЗО) објави дека од 19 декември девет од 36 болници во Газа се делумно функционални и тоа сите на југот. Четири болници на север даваат минимални услуги за веќе примените пациенти, без електрична енергија и резерви и опколени се од страна на израелските сили“, се вели во соопштението.
Во ноември израелските сили воведоа строга блокада на болницата Ал-Шифа, имајќи ги како директна цел пациентите, повредените во нападите, медицинскиот персонал и раселените.
Армијата се повлече од најголемата болница во Газа на 25 ноември, приближно 10 дена по упадот.
Израел започна со жестоки напади врз Појасот Газа по нападот на Хамас на 7 октомври, од кога загинати се повеќе од 20.000 Палестинци, главно жени и деца, а повредени 52.586, според здравствените власти во енклавата.
Израелските напади ја претворија Газа во урнатини, а половина од станбениот фонд на крајбрежната територија е оштетен или уништен, а речиси 2 милиона луѓе се раселени во густо населената енклава поради недостиг од храна и чиста вода.
Се верува дека во нападот на Хамас биле убиени речиси 1.200 Израелци.
