Трамп ја повлече поканата до Канада за вклучување во „Одборот за мир“ во Газа

ИСТАНБУЛ (АА) - Американскиот претседател Доналд Трамп рече дека ја повлекува поканата до Канада за нејзино вклучување во „Одборот за мир“, тело наменето да помогне во решавањето на меѓународните конфликти почнувајќи од Појасот Газа, пренесува Анадолу.

„Ве молам, дозволете ова писмо да послужи како претстава дека 'Одборот за мир' ја повлекува својата покана до вас во врска со вклучувањето на Канада во она што ќе биде најпрестижен одбор на лидери некогаш собран, во кое било време“, напиша Трамп на својата платформа Truth Social, обраќајќи се до канадскиот премиер Марк Карни.

Карни, во обраќањето на Светскиот економски форум во Давос, Швајцарија, во вторникот, предупреди на ерозијата на меѓународниот поредок базиран врз правила, традиционално поврзан со американското лидерство и ги повика „средните“ сили да ја диверзифицираат трговијата и да ја зајакнат својата издржливост.

По говорот на Карни, Трамп во средата го нападна канадскиот премиер велејќи дека Канада треба да им биде „благодарна“ на САД.

Односите меѓу Канада и САД се затегнати откако Трамп воведе царини за канадската стока, а подоцна ги стопираше и трговските разговори поради реклама против царините емитувана во САД.