Michael Gabriel Hernandez
03 Октомври 2025•Ажурирај: 04 Октомври 2025
ВАШИНГТОН (АА) - Американскиот претседател Доналд Трамп ја одреди недела вечер како краен рок Хамас да го прифати неговиот предлог за прекин на огнот и размена на затвореници, нарекувајќи го „последна шанса“ за палестинската група, пренесува Анадолу.
Трамп денес порача дека Хамас мора да го прифати договорот до 18 часот по источно време во недела, велејќи дека ако дотогаш не се постигне согласност, „против Хамас ќе избувне пекол каков што никој досега не видел“.
„Како одмазда за нападот од 7 октомври (2023 година) врз цивилизацијата, повеќе од 25.000 'војници' на Хамас веќе се убиени. Повеќето од останатите се опколени и воено се во стапица, само чекаат да им дадам збор, 'тргнете', за нивните животи брзо да бидат згаснати“, напиша Трамп на својата платформа за социјални медиуми Truth Social.
„Што се однесува до останатите, знаеме каде сте и кои сте и ќе бидете ловени и убиени. Ве молам, сите невини Палестинци веднаш да ја напуштат оваа област на потенцијално голема претстојна смрт кон побезбедни делови од Газа. Сите ќе бидат добро згрижени од оние што чекаат да помогнат“, додаде тој.
Трамп не прецизираше на која област „на потенцијално голема претстојна смрт“ мисли, но последните недели Израел ја ескалира својата кампања во градот Газа.
Обединетите нации (ОН) вчера соопштија дека повеќе од 417.000 луѓе се раселени од северна Газа од средината на август, предупредувајќи за ужасни и небезбедни услови на југот од енклавата, каде што на цивилите им е кажано да одат од страна на израелските сили.
Шефот на ОН за хуманитарна помош, Том Флечер, на американската компанија за социјални медиуми X напиша дека „продолжуваат борбите во градот Газа. Пристапот до северот е тежок. Има потреба од непречен хуманитарен пристап, но многу хуманитарци се принудени да ги суспендираат операциите“.
„Издавањето наредби за раселување не ги ослободува страните во конфликтот од одговорност: многу цивили остануваат и мора да бидат заштитени“, додаде тој.
Израел ја држи Газа под блокада, во која живеат речиси 2,4 милиони луѓе, речиси 18 години. Уште повеќе ја заостри опсадата во март кога ги затвори граничните премини и ги блокираше испораките на храна и лекови, туркајќи ја енклавата во глад.
Од октомври 2023 година во израелското бомбардирање убиени се речиси 66.300 Палестинци, повеќето од нив жени и деца. ОН и групите за човекови права постојано предупредуваат дека енклавата станува несоодветна за живот, а гладот и болестите се шират брзо.
