„Седуммина Палестинци починаа од глад во последните 24 часа“, објави Министерството за здравство на Газа

ГАЗА/АНКАРА (АА) - Седуммина Палестинци починаа од глад во последните 24 часа во Појасот Газа, соопшти Министерството за здравство на опколената енклава, јавува Анадолу.

„Болниците во Газа пријавија седум смртни случаи поради глад и неисхранетост во последните 24 часа“, се вели во соопштението на Министерството.

Со најновите смртни случаи бројот на починати лица од глад од октомври 2023 година се искачи на 154, од кои 89 се деца.

Минатата недела Светската програма за храна на ОН (WFP) предупреди дека една третина од населението на Газа останало без храна неколку дена поради израелската опсада.

Според процените на Светската програма за храна, еден од четворица Палестинци во Газа се соочува со услови слични на глад, а 100.000 жени и деца страдаат од акутна неисхранетост.

Израел одржува блокада на Газа веќе 18 години, а од 2 март ги затвори сите премини, влошувајќи ги хуманитарните услови во енклавата.

Палестинските власти велат дека се потребни минимум 500 камиони со хуманитарна помош дневно за да се задоволат потребите на 2,4 милиони жители на територијата.

Отфрлајќи ги меѓународните повици за прекин на огнот, израелската армија спроведува брутална офанзива во Газа од 7 октомври 2023 година, при што се убиени над 60.000 Палестинци, повеќето од нив жени и деца. Немилосрдното бомбардирање ја уништи енклавата и доведе до недостиг на храна.

Во понеделникот израелските групи за човекови права „Б’Тселем“ и „Лекари за човекови права-Израел“ го обвинија Израел за извршување геноцид во Газа, наведувајќи ги систематското уништување на палестинското општество и намерното уништување на здравствениот систем на територијата.