„Решавањето на катастрофалната ситуација во Газа мора да остане приоритет“, објави Канцеларија за човекови права на ОН

ЖЕНЕВА (АА) - Во услови на зголемените тензии меѓу Израел и Иран во последните денови, Канцеларијата за човекови права на ОН денес ги повика државите да им биде приоритет решавањето на ситуацијата во Газа, јавува Анадолу.

„Канцеларијата за човекови права на ОН ги повикува сите држави со влијание да направат сѐ што е во нивна моќ за да се запре сѐ поужасната криза за човековите права и хуманитарната криза во Газа, зголеменото насилство и целните напади на Западниот Брег и зголемениот ризик од поширока ескалација на конфликтот на Блискиот Исток“, изјави портпаролката на ОХХР, Равина Шамдасани, на брифингот на ОН во Женева.

„Решавањето на катастрофалната ситуација на цивилите во Газа мора да остане приоритет“, нагласи Шамдасани.

Истакнувајќи дека Израел продолжува да воведува незаконски ограничувања за влез и дистрибуција на хуманитарна помош, таа го повтори повикот за итен прекин на огнот.

„Заложниците мора да бидат ослободени и веднаш да се дозволи целосна неограничена хуманитарна помош“, рече таа. „Оние кои испорачуваат или се обидуваат да пристапат до хуманитарна помош никогаш не смеат да бидат нападнати.“

Портпаролот изјави дека ниту една област на Појасот Газа не е поштедена од бомбардирањето на Израел.

Тензиите се зголемија низ окупираната територија поради тековните израелски напади врз Појасот Газа, во кои загинаа речиси 33.800 луѓе од прекуграничниот напад на Хамас на 7 октомври.

Палестинското Министерство за здравство објави дека оттогаш најмалку 468 Палестинци се убиени од истрели на израелската Армија во Западниот Брег.