ИСТАНБУЛ (AA) – Полскиот претседател Карол Навроцки изјави дека Русија и нејзините лидери ќе продолжат да претставуваат долгорочна закана за Централна и Источна Европа, без оглед на можните промени во политичкиот систем во Москва, јавува Анадолу.

Говорејќи на заедничката прес-конференција во главниот град на Литванија, Вилнус, вчера, заедно со литванскиот претседател Гитанас Науседа и украинскиот претседател Владимир Зеленски, Навроцки истакна дека долгогодишните предупредувања на регионот за Русија се покажале како точни.

„Политиките што поддржуваа ‘ресетирање’ на односите со Руската Федерација исчезнуваат, но едно останува непроменето: без разлика дали станува збор за царска Русија, болшевичка Русија или Русија на Владимир Путин, нашите држави, денес независни, сè уште се соочуваат со иста закана“, рече Навроцки.

Тој додаде дека земјите од Централна и Источна Европа не погрешиле во своите процени за руската закана, дури и во период кога западноевропските земји биле фокусирани на климатските политики и миграцијата, пренесе ТВП Ворлд.

Тројцата лидери се сретнаа по повод одбележувањето на годишнината од Јануарското востание во 1863 година против руската власт – неуспешен обид за обновување на полско-литванската заедница, кое било задушено од царските сили по една година.

Навроцки истакна дека востанието има симболично значење, опишувајќи го како морална победа што го зачувала националниот идентитет и пратила порака дека „предавањето не е опција“.

„Оваа поука останува актуелна и денес, во свет во кој империјалната агресија повторно оживува“, нагласи тој.

Полскиот претседател ја истакна и сè поголемата регионална соработка во одбраната, пофалувајќи ги плановите на Литванија за зголемување на воените трошоци на 5,4 отсто од бруто-домашниот производ, што е над нивото на Полска.

„Полска издвојува речиси 5 отсто од БДП за развој на вооружените сили. Имаме најмоќна армија во регионот, со повеќе од 200.000 војници. Затоа имам само пофалби за Литванија“, рече Навроцки.

Тој додаде дека полските сили ќе можат да тренираат на нов воен полигон во Литванија, во близина на Сувалскиот коридор, тесен појас меѓу руската ексклава Калининград и Белорусија, кој се смета за потенцијално жариште во можен иден конфликт.