Saadet Gökce
17 Ноември 2025•Ажурирај: 19 Ноември 2025
ИСТАНБУЛ (АА) - Уште еден случај на високо патогена авијарна инфлуенција - АИ (птичји грип) е откриен денес во јужнокорејската покраина Гјонги, што е петти случај од септември, пренесува Анадолу.
Птичјиот грип H5N1 е откриен на фарма во градот Хвасонг, на околу 60 километри јужно од Сеул, каде што се пријавени уште два случаја на птичји грип во последните пет години, објави Јонхап њуз, повикувајќи се на Централниот штаб за управување со катастрофи.
Властите ќе спроведат специјални карантински инспекции на околу 230 фарми за несилки, каде што претходно се појавиле случаи на птичји грип, а мониторингот на возилата што ги посетуваат зафатените фарми, исто така, ќе се прошири со цел да се спречи натамошно ширење на болеста.
„Неодамнешните епидемии на птичји грип на живинарските фарми се потврдени неколкупати во јужниот регион Гјонги, но со зимските птици преселници што почнуваат да пристигнуваат во земјата и со високо патогените случаи на АИ што се откриваат кај дивите птици во шест различни региони, постои висок ризик од дополнителни епидемии насекаде низ земјата“, изјави Ли Донг-сик, претставник на Министерството за земјоделство задолжен за карантински политики.
Ли ги повика работниците во живинарските фарми и персоналот поврзан со нив да бидат внимателни и строго да се придржуваат кон мерките за карантин.
