ТЕХЕРАН (АА) - Иранската војска денес се закани дека ќе изврши одмазднички напади врз американските и израелските банки во регионот по воздушниот напад врз банка во Техеран, јавува Анадолу.

Катам ал-Анбија, портпаролот на Централниот штаб, заедничката команда на иранските вооружени сили, во својата изјава потврди дека во текот на вчерашниот ден силите на САД и Израел погодиле банка во иранската престолнина.

Портпаролот го опиша нападот како „нелегитимен и неконвенционален воен чин”, додавајќи дека тоа им дава право на иранските вооружени сили да ги стават на нишан економските центри и банки што им припаѓаат на САД и Израел во регионот.

„Американците треба да ја очекуваат нашата болна одмаздничка акција”, предупреди тој.

Портпаролот, исто така, ги повика граѓаните во земјите каде што се наоѓаат американски и израелски банки „да се држат подалеку во радиус од еден километар од овие објекти“.

Неколкумина вработени биле убиени во нападот врз банката во северниот дел на Техеран, известуваат иранските државни медиуми. Според извештаите, вработените работеле дополнителна смена за да ја подготват исплатата на февруарските плати во моментот кога се случил нападот.

Повеќе од 1.200 лица се убиени, меѓу кои и врховниот лидер ајатолахот Али Хаменеи, како и воени лица, а над 10.000 се повредени во Иран откако САД и Израел извршија заеднички напад на 28 февруари, според иранските власти.

За денес попладне се планирани погребните церемонии за убиените воени команданти, меѓу кои и поранешниот командант на Револуционерната гарда, Мохамед Пакпур, поранешниот началник на Генералштабот на вооружените сили, Абдолрахим Мосави и поранешниот шеф на Советот за одбрана, Али Шамкани.

Иран возврати со напади со беспилотни летала и ракети насочени кон Израел, Јордан, Ирак и земјите од Заливот, каде што има американски воени бази.