„Израел се обидува да го сврти вниманието од своите злосторства во Појасот Газа“, смета Иран за нападот врз Мајдал Шамс

ТЕХЕРАН (АА) - Иран го предупреди Израел од каков било нов авантуризам против Либан, откако во ракетниот напад на окупираната Голанска Висорамнина извршен во саботата загинаа најмалку 12 лица, известува Анадолу.

Портпаролот на израелската војска Даниел Хагари во саботата изјави:

„Нашите разузнавачки податоци се јасни. Хезболах е одговорен за убиството на невините деца во Мајдал Шамс“

Хезболах категорично негираше каква било улога во смртоносниот напад, кој доаѓа во време на зголемени тензии меѓу двете завојувани страни.

Во изјавата што денес ја даде Насер Канани, портпаролот на иранското Министерство за надворешни работи, тој се осврна на изјавата на Хезболах во која ја негираат нивната улога во нападот. Канани го обвини Израел дека се обидува да го сврти јавното мислење и глобалното внимание од неговите злосторства во Појасот Газа, каде во брутални бомбардирања и гранатирања уби повеќе од 39.000 Палестинци од 7 октомври минатата година.

Тој тврдењата на Израел во врска со нападот на Мајдал Шамс ги нарече измислено сценарио и додаде:

„Тел Авив нема минимален морален авторитет да суди и коментира за инцидентот.“

Портпаролот Канани ја повика меѓународната заедница, особено Советот за безбедност на ОН, да ја поддржи стабилноста и безбедноста на Либан и да регионот против авантуризмот на агресивниот ционистички режим, мислејќи на Израел.

Тој нагласи дека секоја глупава акција на Израел може да трасира пат за зголемена нестабилност, несигурност и пламен на војна во регионот и рече дека одговорноста за последиците ќе бидат на Израел.

Канани, исто така, ја повика американската влада да дејствува во согласност со нејзината меѓународна и морална одговорност за глобалниот мир и безбедност и да го спречи Израел да го разгори пламенот на војната во Газа и на други места.

По нападот во саботата, кабинетот на израелскиот премиер Бенјамин Нетанјаху соопшти дека тој одлучил да ја прекине посетата на САД и да се врати што е можно поскоро.

Тој, исто така, му рекол на лидерот на заедницата Друзи дека Хезболах ќе плати висока цена за нападот врз Мајдал Шамс, се вели во соопштението на канцеларија на Нетанјаху.

Израелскиот министер за одбрана Јоав Галант денес изјави дека ќе се погрижи Хезболах да ја плати цената.