ЕРУСАЛИМ/ИСТАНБУЛ (АА) - Главниот аеродром во Израел привремено ги прекина летовите денес по ракетниот напад од Јемен, соопштија локалните медиуми, пренесува Анадолу.

Израелската јавна телевизија КАН соопшти дека воздушниот сообраќај на аеродромот „Бен Гурион“ е привремено суспендиран, а полетувањата и слетувањата на неколку летови се одложени, вклучително и летовите на авиокомпаниите „Ел Ал“, „Израир“ и „Аркија“.

Во соопштението на армијата се вели дека воздушната одбрана пресретнала ракета лансирана од Јемен.

Ракетата активираше сирени за воздушен напад во неколку области, меѓу кои пошироката област на Тел Авив и јужната крајбрежна рамнина, каде што живеат милиони Израелци, соопшти КАН.

Јеменската група Хуси го потврди нападот, велејќи дека погодила неколку чувствителни цели со хиперсонична балистичка ракета со повеќе боеви глави.

Групата соопшти дека две витални израелски цели биле погодени и од два дрона во јужниот град Еилат.

Нападот во понеделник се случи три дена откако Израел започна воздушни напади врз позициите на Хусите во јеменскиот главен град Сана, при што загинаа најмалку осум лица, а повеќе од 140 беа повредени.

Хусите и Израел разменија напади во изминатите месеци, поради зголемените тензии околу тековната војна на Тел Авив во Појасот Газа, каде што повеќе од 66.000 луѓе се убиени од октомври 2023 година.