Ayşe İrem Çakır
12 Јуни 2025•Ажурирај: 13 Јуни 2025
АНКАРА (АА) - Патнички авион со 242 патници и членови на екипажот се урна во близина на аеродромот во Ахмедабад, во индиската сојузна држава Гуџарат, известува Анадолу.
Според вестите објавени на индиските медиуми, патничкиот авион што летал од Меѓународниот аеродром „Сардар Валабхаи Пател“ во Ахмедабад до аеродромот „Гетвик“ во Лондон се урнал кратко време по полетувањето.
Додека варира бројот на патници во авионот што сообраќал на летот „АI171“, од Ахмедабад кон Лондон, „Ер Индија“ објави дека во авионот имало 242 патници и членови на екипажот.
Компанијата информираше дека 169 од патниците биле Индијци, 53 биле Британци, 7 биле Португалци и 1 бил Канаѓанец.
Управата за цивилно воздухопловство на Индија претходно објави дека авионот што се урна во Гуџарат превезувал 244 лица, од кои 232 биле патници, а 12 биле членови на екипажот.
Причината за падот на авионот од типот „Боинг 787-8 дримлајнер“, сè уште не е официјално објавена.
- Премиерот Моди се сретна со официјални лица
Индискиот премиер Нарендра Моди за авионската несреќа разговараше со министерот за цивилно воздухопловство Рам Мохан Наиду.
За време на средбата, Моди изјавил дека веднаш ќе биде обезбедена сета потребна поддршка за спроведување на спасувачки и помошни операции на местото на несреќата и побара редовно да биде информиран за ситуацијата.
Министерот Наиду отишол во Ахмедабад за да ја надгледува работата на местото на несреќата.
- Првични изјави од официјалните лица
Индискиот министер за внатрешни работи, Амит Шах, се сретна со државните службеници на Гуџарат во врска со несреќата и најави поддршка од Владата во Њу Делхи.
Актуелниот премиер на Гуџарат, Бупендра Пател, на платформата X изрази длабоко жалење поради трагедијата што се случи поради падот на патничкиот авион.
Истакнувајќи дека на одговорните лица им се дадени инструкции да спроведат операции за спасување и помош, Пател рече дека приоритет ќе бидат сите подготовки за префрлање и лекување на повредените патници во болниците.
„Со длабока тага потврдувам дека летот „AI171“ на Ер Индија, на пат од Ахмедабад кон Гетвик, Лондон, денес заврши со трагична несреќа“, рече претседателот на „Ер Индија“, Натараџан Чандрасекаран, во изјава на платформата X.
Чандрасекаран изрази сочувство до семејствата на погодените од несреќата и рече дека „се прави сè што е можно“ за да им се помогне на тимовите за итни интервенции на терен и да се обезбеди сета потребна поддршка и грижа за погодените.
Чандрасекаран додаде дека е формиран тим за поддршка за оние кои сакаат да добијат информации во врска со несреќата.
- Несреќата се случила 5 минути по полетувањето
Според „Хиндустан тајмс“, генералниот директор на цивилното воздухопловство, Фаиз Ахмед Кидваи, објавил дека авионот, кој полетал во 13:38 часот по локално време, се урнал 5 минути по полетувањето.
„Хиндустан тајмс“ објави дека пилотот упатил „повик за помош“ непосредно пред да се урне авионот, по што се прекинал контактот со авионот.
Веб-страницата „Flight Radar“, која го следи сообраќајот на цивилното воздухопловство низ целиот свет, објави дека сигналот на авионот е изгубен во рок од 1 минута по полетувањето.
Историјата на авионот покажува дека редовно летал помеѓу Индија и светските градови, како Париз, Франкфурт, Токио, Амстердам и Мелбурн.
Во соопштението објавено на профилот на „Ер Индија“ на социјалната мрежа X, се наведува дека авионот, кој се срушил во близина на аеродромот во Ахмедабад, летал кон аеродромот Гетвик во Лондон.
Аеродромот Гетвик објави соопштение во кое потврди дека авионот на летот „AI171“ од Ахмедабад било закажано да слета во 18:25 часот по британско време.
